- १२ भाद्र २०८३, शुक्रबार / Aug 28, 2026
बैतडी । सवारी दुर्घटना बढ्दै गएको छ । ट्राफिक प्रहरीले आफ्नो सक्रियता बढाएको भनी दाबी गरे पनि प्रदेशका नौवटै जिल्लामा सवारी दुर्घटनामा कमी आउन सकेको छैन । तीन वर्षयता सुदूरपश्चिम प्रदेशमा बर्सेनि एक हजार दुई सय ४६ सवारी दुर्घटना भएका छन् । सुदूरपश्चिम प्रदेश ट्राफिक प्रहरी कार्यालय अत्तरियाले जनाए अनुसार दुर्घटनामा परेर ज्यान गुमाउनेको सङ्ख्या बढेको छ ।
सवारी दुर्घटनामा परेर हालसम्म पाँच सय तीन जनाको ज्यान गएको प्रदेश ट्राफिक प्रहरी कार्यालयको तथ्यांक छ । सवारी दुर्घटनामा सबैभन्दा बढी मोटरसाइकल परेका छन् । चालु आर्थिक वर्षको आठ महिनामा मात्रै यहाँ एक सय ८७ सवारी दुर्घटना भएकामा एक सय २१ जनाले ज्यान गुमाएका छन् ।
यस्तै गत आव २०७८, ७९ मा पाँच सय एक सवारी दुर्घटनामा एक सय ९६ जनाले ज्यान गुमाएका छन् । आव २०७७(७८ मा पाँच सय ५८ सवारी दुर्घटनामा एक सय ८६ जनाको मृत्यु भएको छ । यी दुई वर्षमा पनि सवारी दुर्घटनामा परेर सयौँ जना अंगभंग भएका छन् ।
दुर्घटनाका मुख्य कारण ट्राफिक नियमको उल्लङ्घन नै देखिएको सुदूरपश्चिम प्रदेश ट्राफिक प्रहरी कार्यालयका प्रमुख तथा प्रहरी उपरीक्षक नेत्रमणि गिरीले बताए।
