- १० असार २०८३, बुधबार / Jun 24, 2026
काठमाण्डौ । महाकाली नदीले कटान गर्न थालेपछि स्थानीयवासी अस्थायी तटबन्ध निमार्णमा जुटेका छन् । कञ्चनपुरको दोधारा चाँदनी नगरपालिका–१० स्थित कुतियाकवरमा महाकाली नदीले कटान गर्न थालेपछि स्थानीयबासीले अस्थायी तटबन्ध निर्माण थालेका हुन ।
हरेक वर्ष बाढीले क्षति गर्ने गरेकाले बस्तीको विकल्प खोज्नुपर्ने र तीनतिर जोगबुढा नदी र एकतर्फ महाकाली नदीले घेरेकाले डुबान र कटान भइरहेको स्थानीयको भनाइ छ । बाढीकै कारण यहाँबाट धेरै अन्यत्र बसाइँ सरेर गइसको र गत वर्ष बाढीले बेसार र तरकारी खेती बगरमा परिणत गरिदिएको स्थानीयको गुनासो रहेको छ ।
४९ परिवारको बसोबास रहेको यो बस्तीमा यहाँका स्थानीयवासीले तरकारी उत्पादन गरेर जीविकोपार्जन गर्ने गरेका छन् ।
जोगबुढा र महाकाली नदीको दोभान भएका कारण त्यस क्षेत्रमा हरेक वर्ष डुबान र कटान हुने गरेको छ । महाकाली नदीमा सामान्य जलस्तर बढ्दा पनि नदीले बस्तीतर्फ कटान गर्न थालेको दोधारा चाँदनी नगरपालिकाले जनाएको छ ।
महाकाली नदीमा जलस्तर बढ्दा काम गर्न निकै कठिन भएकाले यस क्षेत्रमा स्थानीयवासीले रुखका हाँगा, बाँस र डोरीले पानीको प्रवाह कम गर्न अस्थायी तटबन्धको काम गरिरहेको स्थानीयले बताएका छन् ।
