ह्वातै देखियाे ६७१ नयाँमा कोरोना, नेपालमा संक्रमितकाे संख्या ७ हजार ८४८ पुग्याे (भिडियाेसहित)

४ असार २०७७ काठमाडौं- नेपालमा थप ६७१ जनामा कोरोना भाइरसको संक्रमण देखिएको छ। पछिल्लो २४ घण्टामा देशका विभिन्न प्रयोगशालामा गरिएको परीक्षणका क्रममा थप ६७१ जनामा कोरोना भाइरसको संक्रमण पोजेटिभ देखिएको हो ।

स्वास्थ्य तथा जनसंख्या मन्त्रालयका प्रवक्ता डा जागेश्वर गौतमका अनुसार ६७१ जनामा संक्रमण देखिएको हो । आज थपिएका ६७१ सहित नेपालमा संक्रमितको संख्या ७ हजार ८ सय ४८ पुगेको प्रवक्ता डा गौतमले जानकारी दिए ।

भिडियाे…

पछिल्लो २४ घण्टामा थप १९ जना उपचारपछि निको भएर डिस्चार्ज भएका छन्। यो सहित डिस्चार्ज हुनेको संख्या ११८६ पुगेको छ। कुल संक्रमितमध्ये २२ जनाको मृत्यु भएको छ । प्रवक्ता डा गौतमका अनुसार हालसम्म देशका ७४ जिल्लामा संक्रमण देखिएको छ।

कर्णालीमा थप १२० जनामा कोरोना पुष्टि

कर्णाली प्रदेशमा आज थप १२० जनामा कोरोना पुष्टि भएको छ । कर्णाली प्रदेश अस्पताल तथा पशुपंक्षी रोग अन्वेषण प्रयोगशाला सुर्खेतमा गरिएको कोरोना परीक्षणमा दैलेख ८६ र सुर्खेतका ३४ जनामा आरटी पिसिआर रिपोर्ट पोजेटिभ आएको हो ।

कर्णाली प्रदेश सरकार सामाजिक विकास मन्त्रालय स्वास्थ्य सेवा महाशाखाले आज सार्वजनिक गरेको प्रेस विज्ञप्ति अनुसार दैलेखको महावु गाउँपालिकामा मात्र पाँच महिलासहित ७६ जनामा कोरोना पुष्टि भएको छ । उक्त गाउँपालिकाको वडा नम्बर २ मा ५२ जनामा संक्रमण पुष्टि भएको स्वास्थ्य सेवा महाशाखाले जानकारी दिएकाे छ ।

त्यस्तै, गुराँसे गाउपालिकामा पाँच, भैरवी गाउँपालिका एक, चामुण्डा बिन्द्रासैनी र दुल्लु नगरपालिकामा दुई दुई जनामा कोरोना संक्रमण पुष्टि भएको छ । त्यसैगरी, सुर्खेत पञ्चपुरी नगरपालिकामा १०, चिङ्गाड गाउँपालिकामा आठ, वीरेन्द्रनगर नगरपालिकामा छ, गुर्भाकोट नगरपालिकामा पाँच, बराहताल र चौकुने गाउँपालिकामा दुई दुई, र सिम्ता गाउँपालिकामा एक जनामा संक्रमण देखिएको छ ।

आज १२० जना कोरोना थपिएसँगै अब कर्णालीमा कोरोना संक्रमितहरुको संख्या एक हजार २२४ पुगेको छ । प्रतिष्ठान जुम्लाबाट छ, आइसोलेसन केन्द्र सुर्खेत सालकोटबाट तीन, सिम्ताबट एक र महाबु आइसोलेसन केन्द्र दैलखबाट एक जना डिस्चार्ज भएसँगै कोरोना जित्नेहरुको संख्या ५०५ पुगेको छ ।

नवलपरासी पूर्व ४२ जनामा कोरोना 

नवलपरासी पूर्वमा १८ जना नयाँ संक्रमण पुष्टि भएको छ । त्यस्तै, तनहुँमा १२ जना, मनाङमा १ जना, गोरखामा ११ जनामा संक्रमण पुष्टि भएको छ ।

मनाङको एक जना कपिलवस्तुबाट फर्किएका र अरु सबै भारतबाट फर्किएका सूचनामा निर्देशनालयद्वारा जारी सूचनामा उल्लेख छ । संक्रमित सबै सम्बन्धित जिल्लाको क्वारेन्टाइनमा छन् । अध्यावधिक विवरण अनुसार गण्डकी प्रदेशमा कोरोना संक्रमितको संख्या २८९ पुगेको छ ।

धनगढीमा संक्रमितको मृत्यु

सेती प्रादेशिक अस्पतालमा उपचाररत एक जना कोरोना संक्रमितको मृत्यु भएको छ । अस्पतालका प्रवक्ता डा जगदीशप्रसाद जोशीका अनुसार गोदावरी नगरपालिका–४ का ४६ वर्षीय कोरोना संक्रमितको बुधबार साँझ ७ बजेर ५२ मिनेटमा मृत्यु भएको हो ।

चिकित्सकले उनलाई कडा खालको निमोनियासँगै कोरोनाको संक्रमणबाट मृत्यु भएको बताएका छन् । चिकित्सकका अनुसार उनलाई कोरोनाको लक्षण देखिएको १२ दिनभन्दा बढी भइसकेको थियो । उनी बस मालिक हुन् । भारतबाट आएका नेपालीहरुलाई आफ्नो बसमा राखेर विभिन्न स्थानमा पुर्याउने क्रममा उनी संक्रमित भएको शंका गरिएको छ ।

उनी कहिले आफै बस चलाउथे भने कहिले बसको क्याबिनमा चालकसँगै बस्थे । त्यही क्रममा उनी संक्रमित भएको बताइएको छ । कोरोनाको लक्षण देखिएपछि उनी धनगढीस्थित माया मेट्रो अस्पतालमा भर्ना भएका थिए । त्यहाँ सामान्य उपचारपछि घर गएका उनी संक्रमणले च्यापेपछि नवजीवन अस्पतालमा भर्ना भए  ।

नवजीवनको आईसियूमा उपचारका क्रममा कोरोना संक्रमणको पुष्टि भएपछि उनलाई शनिबार राती उपचारका लागि सेती प्रादेशिक अस्पताल लगिएको थियो । सेती प्रादेशिक अस्पतालकै भेन्टिलेटरमा उपचारका क्रममा उनको मृत्यु भएको हो ।