उखु किसानको बाँकी रकम सरकारी नियन्त्रणमा

काठमाडौं । उद्योग वाणिज्य तथा आपूर्ति मन्त्रालय र उखु किसानबीच भएको सम्झौताको अवधि सकिएको छ । ६६ करोड बक्यौता रकम उठ्नुपर्नेमा करिब ४४ करोड रुपैयाँ मात्रै बक्यौता उठेको जनाइएको छ ।

४३ करोड ९७ लाख रुपैयाँ उठेर थप रकमसमेत सरकारी नियन्त्रणमा आएको प्रशासनले जानकारी दिएको छ । किसानको पैसा केही उठेर बाँकी रकम सरकारी नियन्त्रणमा रहेको जानकारी आएको उखु किसानका संरक्षक राकेश मिश्रले बताए । उद्योगीबाट जफत गरेर उठाउनुपर्ने रकम राखिएको उद्योग मन्त्रालयले भनेको उनको भनाई छ ।

अहिलेसम्म कति किसानले रकम पाए त्यसको विवरणसमेत नदिइएको उनको जिकिर छ । सरकारको यो गतिविधिबाट किसानहरू असन्तुष्टि छन् भने उखु किसान आन्दोलनमै छन् । आन्दोलन चलिरहेकै वेला श्रीराम सुगर मिलले २६ करोड, लुम्बिनी चिनी मिलले २ करोड र अन्नपूर्ण चिनी मिलले ५.५ करोड रुपैयाँ भुक्तानी दिएका थिए । पैसा उठ्ने आसमा किसानले आन्दोलन स्थगित गरेका थिए ।