- १२ कार्तिक २०८३, बिहीबार / Oct 29, 2026
काठमाण्डौ । तनहुँ–१ मा अत्यावश्यकबाहेकका गाडी चल्न जिल्ला प्रशासन कार्यालयले रोक लगाएको छ । बैशाख १० गने हुने उपनिर्वाचनलाई मध्यनजर गर्दै पृथ्वी राजमार्ग अन्तर्गत तनहुँ–१ मा गाडी आवागमन रोकिने जिल्ला प्रशासन कार्यालय तनहुँले रोक लगाएको हो । पृथ्वी राजमार्ग अन्तर्गत मुग्लिनको पुलदेखि दमौलीमा रहेको मादी पुलसम्म र डुम्रे बेशीशहर सडक खण्ड, गोरखा आँबुखैरेनी सडक खण्ड र दमौली दुईपिप्ले सडक खण्डमा अत्यावश्यक बाहेकका गाडी चल्न रोक लगाइएको जिल्ला प्रशासन कार्यालय तनहुँले जनाएको छ ।
पृथ्वी राजमार्ग हुँदै तनहुँ कटेर अन्त जाने यात्रुहरुले आइतबार बिहान ५ बजेअघि वा बेलुका ५ बजेपछि मात्रै यात्रा गर्नुपर्ने उल्लेख गरिएको छ । दमकल, एम्बुलेन्स, खानेपानी, दूध र फोहोरमैला बोक्ने सवारी साधन, शववाहन, परिचयपत्र बोकेका चिकित्सक तथा स्वास्थ्यकर्मी र सूचना विभागको परिचयपत्र बोकेका पत्रकार चढेको गाडी भने चलाउन पाइनेछ ।
तनहुँ १ सहित चितवन २ र बारा २ मा पनि उपचुनाव हुँदै छ । बिहान ५ बजेदेखि साँझ ५ बजेसम्म राजमार्गमा समेत गाडी चलाउन नपाइने जिल्ला प्रशासन कार्यालय तनहुँले जनाएको छ ।
