मेयर र अधिकृत कलहकाे दलदलमा मध्यपुर थिमिनगरपालिका

भक्तपुर । नगरपालिकाका मेयर मदनसुन्दर श्रेष्ठ र कार्यकारी अधिकृत उद्धवप्रसाद रिजालबीचको द्वन्द्वका कारण मध्यपुर थिमि नगरपालिका यतिबेला द्वन्द्व र कलहको दलदलमा फँसेको छ । जसका कारण दसैंअघि पाउनुपर्ने सामाजिक सुरक्षा भत्ता तिहारअगाडि नपाउने निश्चित भएको छ ।

नगरसभाबाट बजेट विनियोजन भई नियमित रूपमा उपभोक्ता समितिबाट भइरहेका योजनाका कामलाई दसैं अगाडि नै रकम निकासा दिनुपर्ने भए पनि रोक्का गरेको, नगरभित्रको आन्तरिक राजनीतिमा अधिकृतले चलखेल गरेको र नगरका दस्तावेजलाई बदनियतपूर्वक बाहिर पठाई वडाध्यक्षहरूसँग मिलेर मेयरविरूद्ध गतिविधि गरेको मेयर श्रेष्ठले आरोप लगाएका छन् ।

४९औं कार्यपालिका बैठकबाट कार्यकारी अधिकृत रिजाललाई मन्त्रालय नै फिर्ता पठाउने निर्णय समेत गरेको छ । दुईपक्षबीचको द्वन्द्वले ज्येष्ठ नागरिक, अपांगता भएका व्यक्ति,, एकल महिला झन पीडित बन्न पुगेका छन् ।