के युद्धकै तयारीमा हो त भारत ?

१३ असार २०७७ बेइजिङ । चीन भारत सीमा लद्दाखस्थित गलवान घाटीमा हालै भएको भारत र चीनबीच तनाव झन झन बल्झीरहेको छ । वार्ताहरू भइरहे पनि भारतले चीनसंग निउ खोजिरहेको छ । सीमामा आफ्नो फौजलाई लगातार उच्काइरहेको छ ।

वास्तविक नियन्त्रणको रेखा (एलएसी)मा हतियार प्रयोग गर्न निषेध गरिएको भएपनि सन् १९९६ को सम्झौतामा उल्लेख भएका सर्तहरु उलंघन भएका छन् । भारतको बद्मासीपूर्ण चाल बुझेर चीनले पनि आफ्ना सैनिक थप तालिम र भर्ना खोलेको जनाएको छ।

परम्परागत युद्धमा माहिर तिब्बतीलाई पनि सेनामा भर्ना खोलेर तयारी गरिरहेको तर आफुले युद्ध नचाहेको जनाउदै चीनले परिआएको खण्डमा दनक दिएर छाड्ने संकेत देखाएको छ । लट्ठी, भाला, डन्डा तथा रडले युद्ध गर्न सिपालु चीनी सैनिकले यहि कलाका कारण भारतीय सैनिकलाई लदाखमा चुँ सम्म बोल्न नदिएर २० जनाको ज्यान लगेको थियो ।

चीनले अब अमेरिकाको आडमा भारतले निहुँ खोजिरहे चुपलागेर बस्न नसकिने बताएको पिपुल्स डेलीको रिपोर्टमा जनाएको छ । भारत र चीनले दुवै देशबीचको आपसी विश्वास बढाउन सन् १९९६ र सन् २००५ मा सम्झौताहरू गरेका थिए । सम्झौतामा दुवै देशका सैनिक गस्तीको समयमा आमनेसामने भए पनि गोली चलाउन निषेध गरिएको थियो ।

दुवै देशका सेनाले गस्तीको समयमा एलएसीको दुई किलोमिटरसम्म आफ्नो राइफलको ब्यारललाई जमिनतिर झुकाएर राख्नुपर्ने नियम छ । बिनासूचना एलएसीको १० किलोमिटरभित्र दुवै देशका सैन्य विमानको उडानलाई पनि प्रतिबन्ध लगाइएको थियो । जुन सम्झौताका कारण सन् १९७५ यता एलएसीमा शान्ति कायम छ ।

आजसम्म दुवै देशबीच त्यस्तो घटना पनि घटेको छैन । तर, अहिले उक्त सम्झौताविपरीत कदम चालिएको भन्दै भारतले दोषारोपण गरिरहेको छ । भारतले चीनमाथि युद्ध गर्न हतियार चलाउन आदेश दिएको र थप हतियार किन्न लागिपरेको भारतीय सञ्चार माध्यमले जनाएका छन् ।

चीनले पनि सीमामा धेरै तोप, ट्यांकर र अन्य हतियारसहित परिआए जवाफी कारबाही गर्न तयारी अवस्थामा राखेको छ । भारतले सीमा नजिक स्थल र वायु सेना तैनाथ गराएको छ । भारतले नौसेनालाई पनि हिन्द महासागर क्षेत्रमा गस्तीमा खटाएको जनाएको छ ।

एजेन्सीको सहयोगमा