जिप दुर्घटनामा एकको मृत्यु, एक घाइते

गुल्मी । मालिका गाउँपालिका २ दर्लिङ्गको दुनाममा जिप दुर्घटना हुदा एक जनाको मृत्यु भएको छ । एक घाइते भएका छन् । गए राती करिब ११ः४० बजे जिप दुर्घटना भएको प्रहरीले जनाएको छ । दर्लिङ्गदेखी बागलुङको भिमगिठे जाँदै गरेको लु १ च ९९११ को डबल क्याब जिप दुर्घटना भएको हो ।

दुर्घटनामा परी सह–चालक बागलुङको बडिगाड गाउँपालिका ९ बल्गास बस्ने १८ वर्षीय किशोर केसीको घटनास्थलमै मृत्यु भएको प्रहरी कार्यालय गुल्मीले जनाएको छ । सोही ठाउँका चालक २१ वर्षीय प्रेम केसी घाइते भएका छन् ।

घाइते केसीको अवस्था मध्यम रहेकोले लुम्बिनी मेडिकल कलेज प्रभासमा उपचार भइरहेको प्रहरीको भनाइ छ । जिप एक्कासि ब्रेक फेल भएर सडकभन्दा करिब १५० मिटर तल खसेको छ । घटनाको अनुसन्धान जारी रहेको प्रहरीले जनाएको छ ।