ढाका कुमार दुई करोडको अडियो प्रकरणबारे रास्वपाले आज निर्णय गर्दै

काठमाडौं । प्रतिनिधि सभा सदस्य ढाका कुमार श्रेष्ठको दुई करोडको अडियो प्रकरणबारे राष्ट्रिय स्वतन्त्र पार्टीले आज निर्णय गर्ने भएको छ । पार्टीको अनुशासन आयोगले छानबिन गरी प्रतिवेदन बुझाएकोले आज केन्द्रीय समिति बैठकबाट निर्णय हुने रास्वपाले जनाएको छ ।

रास्वपाले दिउँसो २ बजेका लागि केन्द्रीय समिति बैठक बोलाएको छ । पार्टी कार्यालय बसुन्धरामा बस्ने सोही बैठकबाट निर्णय हुनेछ । रास्वपाका सांसाद ढाका कुमारले व्यवसायी दुर्गा प्रसाईंसँग २ करोड रकम मागेको अडियो सार्वजनिक भएको छ ।

त्यसबारे छानबिन गर्ने जिम्मा रास्वपाले अनुशासन आयोगलाई दिएको थियो । आयोगले मंगलबार छानबिन प्रतिवेदन पार्टीलाई बुझाइसकेको छ । उक्त प्रतिवेदनका आधारमा केन्द्रीय समिति बैठकले निर्णय गर्ने बताइएको छ ।