- १८ असार २०८३, बिहीबार / Jul 2, 2026
काठमाडौं । सन् २०१६ मा भारत सरकारले गरेको नोटबन्दीको निर्णय सही भएको सर्वोच्च अदालतले फैसला गरेको छ । अदालतको फैसलासँगै नोटबन्दीको मुद्दा टुंगिएको छ ।
नोटबन्दीको निर्णय सही भएको फैसाला आउँदा नेपाली बैंकिङ प्रणालीमा प्रतिबन्धित ५०० र एक हजार दरका ५ करोड ६ लाख भारतीय रुपैयाँ खोस्टामा परिणत हुने भएको छ ।
नेपाली बैंकमा रहेको उक्त भारतीय रुपैयाँ कागजको खोस्टो बन्ने राष्ट्र बैंकका अधिकारी बताउँछन् । नेपाल राष्ट्र बैंकले आफूसँग रहेका भारतीय नोट साट्न भारतको केन्द्रीय बैंकलाई पटक पटक पत्राचार गरेको तर, भारतले कुनै पनि सुनुवाइ नगरेको स्रोत बताउँछ ।
प्रतिबन्धित भारु साट्ने विषयमा भारतीय केन्द्रीय बैंकका अधिकारीहरुसँग छलफल गरिए पनि सार्थकता हुन नसक्ने अधिकारीको भनाइ छ । कालोधन नियन्त्रणका लागि भन्दै सन् २०१६ मा ५०० र एक हजार दरका नोटमा भारत सरकारले प्रतिबन्ध लगाएको थियो ।
सरकारको उक्त निर्णयविरुद्ध सर्वोच्च अदालतमा रिट परेको थियो । उक्त रिटको पक्षमा भारतको सर्वोच्च अदालतले फैसला सुनाएको भए नेपालका बैंकमा रहेका उक्त प्रतिबन्धित नोटले वैधता पाउने थियो । सर्वोच्चको फैसलाले उक्त सम्भावना सकिएको छ ।
