- १ भाद्र २०८३, सोमबार / Aug 17, 2026
काठमाडौं । नेपाल–चीन व्यापारिक कारोबार हुने उत्तरको मुख्य तातोपानी नाका सोमबारबाट दुईतर्फी सञ्चालन हुने भएको छ । आठ वर्षदेखि बन्द रहेको मानवीय आवागमन भने रोकिएको छ ।
‘द्विदेशीय सहमतिअनुसार नाका सोमबारदेखि दुईतर्फी सञ्चालनमा आउन लागेको हो ।
नाका दुईतर्फी सञ्चालनमा आएसँगै चीनबाट आयात मात्र हुँदै आएकोमा अबदेखि निर्यात व्यापार पनि सुरु हुने तातोपानी सुक्खा बन्दरगाह भन्सार कार्यालयका प्रमुख अधिकृत दयानन्द केसीले बताए । २०७२ वैशाख १२ गते गएको भूकम्पपछि बन्दप्रायः रहँदै आएको नाका पूर्णरूपमा सञ्चालनमा आउन सकेको छैन ।
केसीले भने, ‘नाकाबाट आयात मात्रै हुँदै आएको थियो । अब निर्यात व्यापार पनि सुरु हुन लागेको हो । मानवीय आवागमन अझै खुला हुने छैन।’ ल्हासामा नेपाल–चीनका वाणिज्य अधिकारीबीच भएको सहमतिअनुसार तातोपानीबाट दुईतर्फी व्यापार सञ्चालनमा आउन लागेको हो ।
सहमतिअनुसार उत्तरको अर्को महत्वपूर्ण नाका रसुवागढी दुईतर्फी सञ्चालनमा आइसकेको छ । चार वर्षबन्द रहेको तातोपानी नाका २०७६ जेठ १५ देखि आंशिक सञ्चालनमा ल्याइएको थियो । आयात व्यापार थालिए पनि मानवीय आवागमनमा भने रोक लगाइएको थियो ।
अहिले पनि नाकाबाट मानवीय आवागमन नखुल्ने चिनियाँ अधिकारीले बताएका छन् । तत्काल बैठक बसेर मानवीय आवागमन पनि खुलाउने विषयमा छलफल भइरहेको केसीको भनाइ छ । दुईतर्फी नाका सञ्चालनमा आए पनि नेपाली मजदुर तिब्बत प्रवेश गर्न भने नपाउने केसीले बताए ।
चिनियाँ कन्टेनरले नै चीनबाट व्यापारिक सामाग्री नेपालको सीमासम्म ल्याउने छन् । नेपालको सीमा मितेरी पुलसम्म आउने सामग्री यतैको कन्टेनरले बन्दरगाह भन्सारसम्म पुर्याउने छन् ।
