नेपाल भित्रने चिनियाँ पर्यटकको संख्यामा वृद्धि

काठमाडौं । कोभिड–१९ पछि आवागमन बन्द भएको रसुवागढी नाका गत चैत १८ गतेदेखि पुनः सञ्चालनमा आएपछि व्यापारीक तथा पर्यटकीय गतिविधि बढेको छ । रसुवाको रसुवागढी नाकामा चहलपहल बढ्दै गएपछि त्यस क्षेत्रको रौनक बढेको हो ।

रसुवाका बासिन्दा केरूङतर्फ जाने र चिनियाँ नागरिक पनि टिमुरे तथा स्याफ्रुबेँसी घुम्न आउने गरेकाले सीमा क्षेत्रका नागरिक बीचको सम्बन्ध प्रगाढ बन्दै गएको स्थानीयले बताएका छन् । २०७२ सालको भूकम्पले रसुवागढीको अध्यागन कार्यालय भत्किएपछि त्यसभन्दा अगाडिका अभिलेखहरु नष्ट भएका छन् ।

यो नाका हुँदै नेपाल भित्रने चिनियाँ पर्यटकको संख्यामा पनि वृद्धि भएको छ । नाकामा दैनिक २५ देखि ३० पर्यटकको आवागमन हुने गरेको छ । चैत १८ देखि असार मसान्तसम्ममा रसुवागढी मितेरीपुलबाट ४६ देशका १० हजार ६ सय ७७ नागरिकले ओहोरदोहोर गरेकोमा २ हजार ८ सय ३७ चिनियाँ पर्यटक रहेको अध्यागमन कार्यालय टिमुरेले जनाएको छ ।