पदाधिकारीविहीन बन्यो लोक सेवा आयोग

काठमाडौँ । लोक सेवा आयोग पदाधिकारीविहीन भएको छ ।आयोगका अध्यक्ष सहित पाँचै जना पदाधिकारीको ६ वर्षे कार्यकाल मङ्गलबार एकै दिन सकिएपछि आयोग पदाधिकारी विहिन बनेको हो ।

पदाधिकरी नियुक्तिको सिफारिस संवैधानिक परिषदले गर्ने भएको हुदा संवैधानिक परिषद्ले नयाँ पदाधिकारी सिफारिस गरेको छैन । पदपूर्तिको समय अनिश्चित जस्तै छ ।अध्यक्ष उमेशप्रसाद मैनाली तथा सदस्यहरू विन्द्रा हाडा भट्टराई, अशोककुमार झा, बह्मदेव राय, कृष्णचन्द्र झाको कार्यकाल पूरा भएर अनिवार्य अवकाशमा छन् ।

यता आयोगले पदाधिकारीबाट सम्पादन हुने सबै काम बन्द गरेको छ । आयोग पूर्णरूपमा पदाधिकारीविहीन भएकाले नयाँ पदाधिकारी नआउँदासम्म पदाधिकारीबाट सम्पादन हुने सबै काम बन्द गरिएको आयोगका सूचना अधिकारी देवीप्रसाद सुवेदीले बताए ।