- २२ कार्तिक २०८३, आईतवार / Nov 8, 2026
काठमाडौं । केही समयदेखि बजारमा चिनीको अभाव देखिएको छ । कृत्रिम रूपमा मूल्य बढाइएको उपभोक्ताले गुनासो गरिरहेका छन् । दशैँ र तिहारजस्ता मुख्य चाडपर्व आउन लागेका बेलामा बजारमा यस्तो अभाव र मूल्यवृद्धि हुनु सरकारको उदासिन्ता भएको उपभोक्ताले गुनासो गरेका छन् ।
सरकारी अधिकारीहरू भने बजारमा देखिएको चिनीको अभाव कम गर्ने प्रयास जारी रहेको आशवासन दिन्छन् । बजारमा देखिएको अभाव कृत्रिम नभइ वास्तविक नै भएको व्यापारी दाबी गर्छन् । यस्तो अभाव आउनुमा सरकारको दोष रहेको उनीहरू बताउँछन् ।
अहिले बजारमा केही पसलेहरूले किलोको १३० रुपैयाँ भन्दा बढीमा चिनी बिक्री गरिरहेको पाइएको छ। मार्ट तथा सुपरस्टोरहरूले पनि चिनीको अभावका कारण बिक्री गर्न पाएका छैनन् । अहिले कम्पनीले किलोको ९७ रुपैयाँमा चिनी बिक्री गरिरहेको साल्ट ट्रेडिङको जनसम्पर्क तथा सञ्चार विभागका विभागीय प्रबन्धक ब्रजेशकुमार झाले बताए ।
यद्यपि माग अनुसार चिनी आपूर्ति गर्न नसकेको स्वीकारे । साल्ट ट्रेडिङ लिमिटेड, खाद्य व्यवस्था तथा व्यापार कम्पनी, दुग्ध विकास संस्थानलगायतले काठमाडौं उपत्यकाभित्र तीनवटा घुम्तीसहित ३५ वटा सुपथ मूल्य पसलहरू सञ्चालनमा ल्याएको मन्त्रालयले जनाएको छ।
बजार अनुगमनका क्रममा सरकारले जफत गरेको ७०० क्विन्टल चिनी साल्ट ट्रेडिङलाई बिक्रीका लागि दिएको छ । त्यसैलाई अहिले कम्पनीले बिक्री गरिरहेको उनले बताए ।
