- ३१ असार २०८३, बुधबार / Jul 15, 2026
३ साउन २०७७ पर्सा । एक महिलालाई बोक्सीको आरोपमा मोसो, जुत्ताको माला र अर्धनग्न बनाई कुटपिट गरेर गाउँ परिक्रमा गराइएको छ । छिपहरमाई गाउँपालिका ३ की छोटकी जयमंगलापुरकी एकल महिलालाई गाउँलेले पेटिकोटमै गाउँ घुमाएका हुन् ।
जुत्ताको माला लगाएर उनलाई गाउँ घुमाउँदा जनप्रतिनिधि तमासा हेरेर बसेको स्थानीयले बताएका छन् । कुटपीटका कारण शरीरभरी निलडाम छ । घटना असार ३१ गते भएको हो । उनले गाउँपालिकाका कार्यपालिका सदस्य सुवास साह कानुलगायत आठ जनाविरुद्ध जिल्ला प्रहरी कार्यालय पर्सामा उजुरी दिएकी छन् । गाउँ घुमाउदा स्थानीयले प्रहरीलाई गोप्य रुपमा खबर गरे र प्रहरी टोली गएर महिलाको उद्धार गरेको थियो ।
‘प्रहरी समयमै नपुगेको भए उनलाई लखेटेर धपाउने योजना बनेको एक स्थानीयले बताए । पीडित महिलामाथि बोक्सीको आरोप लागएर पटक पटक कुटपीट गरिएको छ । एकल महिला भएका कारण उनको पक्षमा बोलिदिने कोही नभएपछि गाउँघरको मामला भन्दै घटनालाई गाउँमै दबाइएको बताइएको छ ।
कुटपीट गर्ने मुन्नीलाल साह कानु, राजदेव शर्मा ठाकुर, इन्दुदेवी ठाकुर र सन्ध्या देवीलाई प्रहरीले नियन्त्रणमा लिएको छ । पर्सा जिल्ला अदालतमा उनीहरुविरुद्ध मुद्दा दर्ता गरी अनुसन्धान भइरहेको प्रहरीले जनाएको छ । गाउँपालिका सदस्य सुवास साह कानुलगायत फरार अभियुक्तहरुको खोजी भइरहेको प्रहरीले जनाएको छ ।
