भारतको श्रावस्तीमा कार दुर्घटना हुँदा दुई परिवारका छ जनाको मृत्यु

काठमाण्डौ। बाँकेको नेपालगञ्जका ६ जनाको भारतमा मृत्यु भएको छ । भारतको श्रावस्ती जिल्लामा कार दुर्घटना हुँदा नेपालगञ्जका ६ जनाको मृत्यु भएको हो । दुर्घटनामा परि मृत्यु हुनेमा नेपालगन्ज सदरलाइनका ३५ वर्षीय वैभव गुप्ता, उनकी श्रीमती ३२ वर्षीया दिपीका गुप्ता, तीन वर्षीय छोरा डल्लु गुप्ता र छ महिनाकी छोरी श्रीया गुप्ताको ज्यान गएको प्रहरीले जनाएको छ ।

नेपालगञ्जको त्रिभुवनचोकका सन्तोष गुप्ताका २२ वर्षीय छोरा निलान्स गुप्ता र २० वर्षीया छोरी सुनिती गुप्ताको दुर्घटनामा ज्यान गएको हो । शनिवार बिहान निलान्स र सुनिती मामाघर घुम्न र वैभव माइतीमा रहेकी दिपीकालाई लिन बलरामपुर पुगेर फर्किने क्रममा कार दुर्घटना भएको हो ।

दुर्घटनामा परि गम्भीर घाइते भएका गाडी चालक अजय मिश्रको उपचार भइरहेको जिल्ला प्रहरी कार्यालय बाँकेले जनाएको छ । भारतको बलरामपुरबाट नेपालगञ्जका लागि छुटेको भारतीय नम्बर प्लेट युपी ४७ डब्ल्यू १२१७ नम्बरको कार दुर्घटना हुँदा दुई परिवारका छ जनाको ज्यान गएको हो ।