- ९ असार २०८३, मंगलवार / Jun 23, 2026
भक्तपुर । सल्लाघारीस्थित राजर्षि गुरुकुलले आरजी मार्केट सञ्चालनमा ल्याएको छ । विद्यार्थीलाई किताबी ज्ञानका साथै व्यवहारिक र प्रयोगात्मक ज्ञान दिने अवधारणाको विकास गराउन स्कुलमा सो मार्केट सञ्चालन गरिएको विद्यालयले जनाएको छ ।
पठनपाठनका अतिरिक्त व्यवहारिक ज्ञान दिनको लागि आरजी मार्केट सञ्चालन गरिएको बताउँदै विद्यालयका प्रधानाध्यापक लियोन श्रेष्ठले विद्यालयमा अध्ययनरत विद्यार्थीहरुलाई उद्यमशीलताको विकास गराउँन यस्तो गरिएको बताए ।
युग सुहाउँदो व्यहारिक सीप दिन र विद्यार्थीको सामाजिकीकरणमा सहयोग गर्न उक्त कार्यक्रमले मदत पुग्ने बताए । व्यापार मेला जस्तै विभिन्न हस्तकला, मौलिक उत्पादनका साथै आफूले बनाएका विभिन्न सामान र चित्रहरुको स्टलहरु राखिएको थियो ।
ती स्टलमा राखिएका सामानहरु उनीहरुले मार्केट अवलोकनका लागि आएका अभिभावक र अन्य व्यक्तिहरुलाई बिक्री गरेका थिए । मार्केटमा चाइनिज स्टल, सातै प्रदेशमा उत्पादित वस्तुहरू सङ्कलित स्टल ,रेक्ट्रो फोटोग्राफी स्टल, नेपाली कागज, आर्ट, गल्फ खेलसम्बन्धी स्टललगायतका पसलहरु राखिएका थिए ।
नेपाली उत्पादनलाई जोड दिदै यस पटकको आर जी मार्केटमा सातै प्रदेशका स्थानीय वस्तुहरू सङ्कलन गरी विक्री तथा प्रवर्द्धन गरिएको थियो । यस्तो कार्यक्रमले आफूहरुमा धेरै हौसला बढेको विद्यार्थीहरुले बताए ।
