- ६ आश्विन २०८३, मंगलवार / Sep 22, 2026
काठमाडौं । सगरमाथा आधार शिविर क्षेत्रको पदयात्रामा हिँडेका एक कोरियाली पर्यटकको मृत्यु भएको छ । ४०४० मिटर उचाइको साम्रे गाउँमा हाइअल्टिच्युट पचाउन नसकी बिरामी भएका पर्यटक ली म्युङकपको बुधवार मृत्यु भएको हो ।
बिरामी भएपछि लुक्लामा उपचारका लागि ल्याइए पनि उनको बाटोमै मृत्यु भएको प्रहरीको भनाइ छ । फ्रेन्डसिप लजमा बास बस्ने क्रममा बिरामी परेका ४६ वर्षीय ली गाइड विना नै पदयात्रामा निस्कीएका थिए ।
पर्यटक गाइड विना पदयात्रामा जान नपाउने र टिम्सको अनुमती समेत नपाउने कानुनी व्यवस्था छ ।
तर यसको कार्यान्वयन नहुँदा पर्यटकहरूको मृत्यु हुने गरेकाले नेपालको पर्यटन क्षेत्रमा गलत सन्देश पुग्ने गरेको नेपाल पर्यटन बोर्डका सदस्य ङावा ङिमा शेर्पाले बताए ।
कानुनी व्यवस्थालाई कडाइका साथ तत्काल कार्यान्वयन गर्नुपर्ने शेर्पाको सुझाव छ ।
