- २ श्रावण २०८३, शनिबार / Jul 18, 2026
जोमसोम । राष्ट्रिय गौरवको सडक आयोजना बेनी–जोमसोम–कोरला सडकको ७३ करोड ६९ लाख रुपैयाँ बजेट फिर्ता भएको छ । चालू आर्थिक वर्ष सडकतर्फ विनियोजन गरिएको १ अर्ब ३३ करोड बजेटमा ७३ करोड ६९ लाख रुपैयाँ बजेट फिर्ता गरेर अर्थ मन्त्रालयले रकमान्तर गरेको छ ।
बजेट आधाभन्दा बढी घटेसँगै आयोजनाको सडकतर्फ चालू वर्षको बजेट ५९ करोड ३१ लाख रुपैयाँमा सीमित गरिएको हो । जसमध्ये १० करोड रुपैयाँ बजेट अर्थ मन्त्रालयले रोक्का गरिराखेको छ ।
सुरुवाती चरणमा सडक स्तरोन्नति सुरु गरिएको बेनी—जोमसोम सडक ४ खण्ड र जोमसोम—कोरला ७ खण्डमा सडक स्तरोन्नति सुरु गरिएको थियो । बेनी—जोमसोम ७६ किमि सडकको तेस्रो खण्ड कैकु—खन्ती २५ किमि डीबीएसडी कालोपत्रे सडक सम्पन्न भइसकेको छ भने अन्य तीन खण्ड निर्माणाधीन अवस्थामा छन् ।
थपिएको मालढुंगा—बेनी १३ किमि कालोपत्रे सडक, बेनी—गलेश्वर ३ किमि कालोपत्रे सडक र जोमसोम—कागबेनी १३ किमि कालोपत्रे निर्माणाधीन अवस्थामा छन् ।
