- ३० श्रावण २०८३, शनिबार / Aug 15, 2026
भक्तपुर । पानी जीवन हो । पानीविना मानिस वाँंच्नै सक्दैन । पानी मानिसका लागि चाहिरहने तरल खाद्य पदार्थ हो । यही कुरालाई मध्यनजर गरी भक्तपुरको चोर्चास्थित सिद्धिगणेश सहकारी संस्था लिमिटेडले सोमबार सर्वसाधारणका लागि निःशुल्क खानेपानीको सुविधा उपलव्ध गराएको छ ।
कार्यालय नजिकै स्टल राखेर निःशुल्क खानेपानीको सुविधा उपलव्ध गराएको हो । बाटोको छेउमा पानीको जारहरु, पानी खन्याउने भाँंडो, पानी खाने जगलगायतका सामान तथा स्वयमसेवक परिचालन गरी पानी खुवाउने बन्दोवस्त संस्थाले मिलाएको हो । विस्का जात्राको क्रममा सोमबार भक्तपुरमा ठूलो जात्रा हुन्छ । यसलाई स्थानीय भाषामा द्यो स्वगं वियगू (देवतालाई सगुन चढाउने जात्रा) भनिन्छ ।
यो क्रममा दिनभर भक्तपुर नगरभरि मानिसको भीड नै लागेको हुन्छ । विहानदेखि रातिसम्म नगरभरि सवैतिर भीड लाखेको हुन्छ । यही भीडमा रहेकाहरुलाई पानीको तिर्खा लाग्ला र उनीहरु पानीको लागि छटपटिएला भनेर पानीको सुविधा दिएको संस्थाले जनाएको छ । संस्थाका कर्मचारी चन्द्र दुमरुले संस्थाले वर्षमा एक पटक यो जात्रामा मात्रै नभई नगरमा भइरहने जात्रापर्वमा यस्तै जनहितकारी कामहरु गर्दै आएको सुनाए । यसका साथै संस्थाले विभिन्न सामाजिक कार्यहरु पनि गर्दै आएको जानकारी उनले गराए ।
