हङकङ विमानस्थलमा कार्गो जहाज चिप्लिएर समुद्रमा खस्यो, दुईजनाको मृत्यु

एजेन्सी । हङकङ अन्तर्राष्ट्रिय विमानस्थलमा एक कार्गो जहाज धावनमार्गबाट चिप्लिएर समुद्रमा खस्दा दुई जनाको ज्यान गएको छ, इमिरेट्स एयरलाइन्सको उडान ईके ९७८८ को बोइङ जहाज गएराति अवतरणका क्रममा दुर्घटनामा परेको हो ।

विमान अवतरणका क्रममा धावनमार्गको दक्षिण भागमा रहेको एउटा गाडीलाई ठक्कर दिँदा दुर्घटना भएको बताइएको छ, सो क्रममा दुईजना ’ग्राउन्ड स्टाफ’ समुद्रमा खसेका थिए, उद्धारपछि अस्पताल लगिए पनि दुबै जनाको मृत्यु भएको हङकङ प्रहरीलाई उद्धृत गर्दै बीबीसीले जनाएको छ ।

जहाजमा चालक दलका चार सदस्य रहेका थिए, उनीहरू जीवितै उद्धार गरिएका र अस्पतालमा उपचाररत रहेको समाचारमा उल्लेख छ ।  दुर्घटनापछि जहाज दुई टुक्रा भएको र एउटा भाग समुद्रमा तैरिरहेको अवस्थामा भेटिएको छ ।

विमानस्थलमा आज कम्तिमा ११ वटा कार्गो जहाज अवतरण गर्ने तालिका रहेकामा सबै उडान रद्द गरिएको विमानस्थलको वेबसाइटमा जनाइएको छ ।