- २२ भाद्र २०८३, सोमबार / Sep 7, 2026
काठमाडौँ । प्रधानमन्त्री सुशीला कार्कीले देशमा सुशासन र विकासको आधारशीला तयार भएको बताउनुभएको छ, तिहार, म्हं पूजा, नेपाल संवत् ११४६ र छठ पर्वको अवसरमा शुभकामना सन्देश जारी गर्दै उहाँले शान्ति, समृद्धि र सुशासनको आकाङ्क्षा पूरा गर्न राष्ट्रिय सङ्कल्पका साथ अघि बढ्न सबै नागरिकलाई आग्रह गर्नुभएको हो ।
प्रधानमन्त्री कार्कीले कठिन परिस्थितिमा पनि एकताबद्ध रहने हाम्रो मौलिक संस्कृति रहेको बताउँदै कुनै पनि भ्रममा नपरी सबै मिलेर निराशा र अन्धकारको अन्त्य गर्दै नयाँ नेपालको उज्यालो भविष्य निर्माणतर्फ लाग्नुपर्नेमा जोड दिनुभएको छ ।
उहाँले आगामी छ महिनाभित्र स्थिर सरकार दिने प्रतिबद्धताका साथ चुनावको वातावरण बनाउन सरकार लागिपरेको उल्लेख गर्नुभयो, साथै राजनीतिक संवाद र सुरक्षास्थिति सुधारका काम सन्तोषजनक रूपमा अघि बढिरहेको जानकारी पनि दिनुभयो ।
प्रधानमन्त्री कार्कीका अनुसार आउँदो फागुन २१ मा स्वच्छ, निष्पक्ष र भयरहित वातावरणमा चुनाव सम्पन्न गर्ने, सुशासन कायम गर्ने, भ्रष्टाचारविरुद्ध ठोस कदम चाल्ने र जेन–जी आन्दोलनका क्रममा भएका दमन तथा हिंसाको निष्पक्ष छानबिन गर्ने कार्य सरकारको प्राथमिक जिम्मेवारी हो ।
यसैबीच राष्ट्रपति रामचन्द्र पौडेल र उपराष्ट्रपति रामसहायप्रसाद यादवले पनि तिहार पर्वको अवसरमा शुभकामना सन्देश पठाउँदै शान्ति र समृद्धिको कामना गर्नुभएको छ ।
