- २९ श्रावण २०८३, शुक्रबार / Aug 14, 2026
काठमाण्डौ, १७ असार । धानचामल आयात गएको वर्षको तुलनामा करिब १७ अर्ब ८२ करोड रुपैयाँ बढेको छ । कृषि तथा पशुपन्छी विकास मन्त्रालयका अनुसार चालू आर्थिक वर्षको ११ महिना जेठ मसान्तसम्म ३८ अर्ब ९४ करोड रुपैयाँको धानचामल आयात भएको छ ।
गएको आर्थिक वर्षको यही अवधिमा २१ अर्ब १२ करोड रुपैयाँ बराबरको आयात भएको थियो । हरेक महिना औसत तीन अर्ब रुपैयाँ भन्दा धेरैको धानचामलको आयात बढेकाले असार मसान्तसम्म थप तीन अर्ब मूल्यको आयात हुने अनुमान गरिएको मन्त्रालयले जनाएको छ ।
चालू आर्थिक वर्षको ११ महिनामा १७ अर्ब ७८ करोड रुपैयाँ बराबरको चामल आयात भएको तथ्याङ्क छ । गएको वर्ष यो अवधिमा १२ अर्ब ४३ करोड रुपैयाँको चामल आयात भएको थियो । बाह्य देशबाट वस्तु स्वदेश आयात बढ्दा व्यापारघाटा थप नकारात्मक हुने अनुमान गरिएको छ ।
मन्त्रालयका अनुसार सामान्यतया वार्षिक झन्डै ७० लाख मेट्रिक टन धानको माग रहेकामा झन्डै ६० लाख मेट्रिक टन धान स्वदेशी उत्पादन हुने गरेको छ । झन्डै १० लाख मेट्रिक टन अपुग धान आयात हुने गरेको छ । कृषि उत्पादन बढाएर आयात प्रतिस्थापन गर्न किसानलाई समयमै मल, बीउ, सिँचाइ सुविधा, अनुदानको व्यवस्थासहित यस क्षेत्रमा नीतिगत सुधार आवश्यक रहेको जानकारहरूले बताउने गरेका छन् । रासस
