- ९ श्रावण २०८३, शनिबार / Jul 25, 2026
काठमाडौं, ९ साउन । नेपालमा कानुनविपरीतका गतिविधिमा संलग्न रहेको आरोपमा ४७ जना विदेशी महिलालाई देश निकाला (डिपोर्ट) गरिएको छ । जिल्ला प्रहरी परिसर काठमाडौंले पत्रकार सम्मेलनमार्फत उनीहरूलाई अध्यागमन विभागको समन्वयमा नेपालबाट फिर्ता पठाइएको जानकारी दिएको हो ।
परिसरका प्रहरी उपरीक्षक (एसपी) पवनकुमार भट्टराईका अनुसार ठमेल, दरबारमार्गलगायत पर्यटकीय क्षेत्रमा सञ्चालन गरिएको विशेष अपरेशनका क्रममा ५७ जना विदेशी महिला पक्राउ परेका थिए । पक्राउ परेकामध्ये ४७ जनालाई देश निकाला गरिएको छ भने अन्य १० जनामाथि अनुसन्धान जारी रहेको छ ।
देश निकाला गरिएका महिलाहरू युगान्डा, भियतनाम, थाइल्यान्ड, बङ्गलादेश, केन्या र इन्डोनेसिया लगायतका विभिन्न देशका नागरिक रहेको प्रहरीले जनाएको छ ।
एसपी भट्टराईका अनुसार नेपालमा अनलाइन बेटिङ सञ्चालन गरी नेपाली नागरिकको ठूलो रकम हुन्डी र क्रिप्टोमार्फत विदेश पठाउने संगठित सञ्जाल सक्रिय रहेको पाइएको छ । यस्ता गतिविधिमा संलग्न व्यक्ति तथा समूहको पहिचान, बेटिङ वेबसाइटको निगरानी र आर्थिक कारोबारको अनुसन्धानलाई तीव्र बनाइएको उनले बताए ।
यसैबीच, सार्वजनिक सेवा प्रवाहमा अवरोध पुर्याउने बिचौलियाविरुद्ध सञ्चालन गरिएको अभियानमा प्रहरीले ३०९ जनालाई पक्राउ गरेको जनाएको छ । तीमध्ये ६१ जनामाथि कानुनी कारबाही प्रक्रिया अघि बढाइएको एसपी भट्टराईले जानकारी दिए ।
