- ९ श्रावण २०८३, शनिबार / Jul 25, 2026
काठमाडौं, ९ साउन । आज जुलाई २५ का दिन संयुक्त राष्ट्रसङ्घको आह्वानमा विश्वभर विश्व डुबेर मृत्यु रोकथाम दिवस विभिन्न जनचेतनामूलक कार्यक्रमका साथ मनाइँदै छ । नेपालमा पनि दिवसको अवसरमा डुबेर हुने दुर्घटना न्यूनीकरणका लागि विभिन्न सचेतनामूलक कार्यक्रम आयोजना गरिएको छ ।
नेपालमा खोला, नदी, पोखरी, कुलो, इनार तथा पानी भरिएका खाल्डाखुल्डीमा डुबेर ज्यान गुमाउने घटनामा वृद्धि भइरहेका बेला यस दिवसले जोखिम न्यूनीकरण र जनचेतना अभिवृद्धिमा विशेष जोड दिएको छ ।
स्वास्थ्य तथा जनसङ्ख्या मन्त्रालयअन्तर्गतको खाद्य तथा स्वच्छता सम्बन्धित निकायले डुबेर हुने मृत्युका घटनालाई जनस्वास्थ्यको महत्वपूर्ण चुनौतीका रूपमा लिँदै रोकथामका प्रयासलाई प्रभावकारी बनाउन आवश्यक रहेको जनाएको छ ।
विश्व स्वास्थ्य सङ्गठन (डब्लुएचओ) का अनुसार विश्वभर हरेक वर्ष तीन लाखभन्दा बढी मानिस डुबेर ज्यान गुमाउने गरेका छन् । नेपालमा पनि डुबेर हुने घटनालाई सार्वजनिक स्वास्थ्यको गम्भीर समस्याका रूपमा लिइएको छ ।
विज्ञहरूले समुदायस्तरमा जनचेतना अभिवृद्धि गर्ने, विद्यालयमा सचेतनामूलक कार्यक्रम सञ्चालन गर्ने तथा स्थानीय तहले आफ्नो वार्षिक योजनामै डुबेर हुने दुर्घटना न्यूनीकरणका कार्यक्रम समावेश गर्नुपर्ने सुझाव दिएका छन् । साथै नदी, खोला र जलाशय आसपास आवश्यक सुरक्षा उपाय अपनाउन पनि आग्रह गरिएको छ ।
