- २१ जेष्ठ २०८३, बिहीबार / Jun 4, 2026
काठमाडौं, ४ वैशाख । देशका अधिकांश भागमा अहिले पश्चिमी तथा स्थानीय वायुको आंशिक प्रभावका कारण मौसममा आंशिक बदली देखिएको छ ।
जल तथा मौसम पूर्वानुमान महाशाखाका अनुसार हाल हिमाली क्षेत्रमा सामान्य बदली, पहाडी क्षेत्रमा आंशिक बदली तथा तराई क्षेत्रमा मुख्यतया सफा मौसम रहेको छ । कोशी प्रदेशका पहाडी भू–भागका केही स्थानमा हल्का वर्षा र हिमपात भइरहेको जनाएको छ ।
आज दिउँसो कोशी, बागमती र गण्डकी प्रदेशका हिमाली तथा पहाडी क्षेत्रका केही स्थानमा मेघगर्जन तथा चट्याङसहित हल्का वर्षा वा हिमपातको सम्भावना रहेको छ । त्यसैगरी कर्णाली र सुदूरपश्चिम प्रदेशका हिमाली भेगका एक–दुई स्थानमा पनि समान प्रकृतिको मौसम रहने अनुमान गरिएको छ ।
आज राति हिमाली क्षेत्रसहित कोशी, बागमती र गण्डकी प्रदेशका पहाडी भू–भागमा सामान्य बदली रहनेछ भने अन्य स्थानमा आंशिक बदली रहने जनाइएको छ ।
यसबीच देशभर तापक्रम क्रमशः बढ्दो क्रममा रहेको छ । विशेषगरी लुम्बिनी र सुदूरपश्चिम प्रदेशका तराई क्षेत्रमा अन्य भागको तुलनामा बढी गर्मी हुने सम्भावना रहेको मौसमविद्ले बताएका छन् ।
