- ४ बैशाख २०८३, शुक्रबार / Apr 17, 2026
काठमाडौं , ४ वैशाख । जिल्ला अस्पताल सल्यानमा चिकित्सक अभावका कारण सल्यक्रिया सेवा पूर्ण रूपमा बन्द हुँदा सेवाग्राहीहरू गम्भीर समस्यामा परेका छन् ।
अस्पतालले विगतमा जटिल अवस्थाका गर्भवती तथा सुत्केरी हुन नसकेका महिलाहरूलाई सल्यक्रिया सेवा उपलब्ध गराउँदै आएको थियो । तर एमडीजीपी चिकित्सकको अभाव भएपछि चैत्र २८ गतेदेखि उक्त सेवा ठप्प भएको हो ।
सेवा बन्द भएसँगै सल्यक्रियाका लागि आएका बिरामीहरू दाङ, सुर्खेत र नेपालगञ्ज जान बाध्य भएका छन् । यसअघि जिल्लामै न्यून शुल्कमा उपचार पाउँदै आएका स्थानीयहरू अहिले बाहिर जानुपर्दा आर्थिक भार थपिएको छ भने जटिल अवस्थाका गर्भवती महिलाहरूका लागि जोखिमसमेत बढेको छ ।
सिद्ध कुमाख गाउँपालिका–५ की यमुना खड्काले सल्यक्रिया सेवा बन्द भएको खबरले आफूहरू चिन्तित बनेको बताइन् । ‘बहिनीको डेलिभरीका लागि आएका हौं, अहिलेसम्म अवस्था सामान्य छ । तर बीचमा समस्या आए अप्रेसन गर्ने डाक्टर नहुँदा निकै डर लागेको छ’, उनले भनिन् ।
यस्तै, शारदा नगरपालिका–२ की अस्मिता बस्नेतले पनि अप्रेसन सेवा बन्द हुँदा सास्ती खेप्नुपरेको बताइन् । ‘डाक्टर अभावका कारण अप्रेसन सेवा बन्द रहेछ, हामीलाई निकै समस्या भयो । अप्रेसनकै लागि जिल्ला बाहिर जानुपर्ने बाध्यता आयो’, उनले गुनासो गरिन् ।
जिल्ला अस्पताल सल्यानमा प्रत्येक महिना एक सयभन्दा बढी महिला सुत्केरी हुने गर्छन्, जसमा केहीलाई सल्यक्रिया आवश्यक पर्ने गर्दछ । हाल भने सामान्य सुत्केरी सेवा मात्र सञ्चालनमा रहेको छ ।
स्वास्थ्य सेवा कार्यालय सल्यानका प्रमुख अर्जुनकुमार बुढामगरका अनुसार जटिल अवस्था भएका तथा मिति नाघेका गर्भवतीहरूलाई जिल्ला बाहिर रेफर गर्ने गरिएको छ । एमडीजीपी चिकित्सक अभावबारे संघ तथा प्रदेश सरकारलाई जानकारी गराइए पनि हालसम्म समस्या समाधान हुन सकेको छैन ।
अस्पतालमा कार्यरत एमडीजीपी डा. बुद्धिनाथ साह बिरामी भई उपचाररत रहेको र तालिमप्राप्त मेडिकल अफिसर उच्च अध्ययनका लागि बाहिर गएपछि सेवा सञ्चालनमा थप समस्या देखिएको जनाइएको छ ।
