“सम्पदा जोगाउनु देशको अस्तित्व जोगाउनु हो”

भक्तपुर, ८ जेष्ठ । नेपाल मजदुर किसान पार्टी (नेमकिपा) का अध्यक्ष नारायणमान बिजुक्छेँ (रोहित) ले भक्तपुर नगरपालिकाद्वारा निर्माणाधीन अरनिको सभाभवन, थन्थु दरबार, र हाडा छेँ पुनःनिर्माण स्थलहरूको स्थलगत निरीक्षण गर्नुभयो।

निरीक्षणका क्रममा अध्यक्ष बिजुक्छेँले व्यक्तित्व, समाज र राष्ट्रको पहिचान त्यस मुलुकको कला, संस्कृति र सम्पदा बाट हुने उल्लेख गर्दै स्थानीय तहहरूले सम्पदा संरक्षणमा अग्रसर हुनु आवश्यक रहेको धारणा व्यक्त गर्नुभयो।

उहाँले भन्नुभयो, “स्थानीय तहबाटै संस्कृति र सम्पदाको संरक्षण हुनुपर्छ। सम्पदाको जगेर्ना भनेको देशको अस्तित्वको रक्षा गर्नु हो।” अध्यक्ष बिजुक्छेँले भक्तपुर नगरपालिकाले अन्य स्थानीय तहका लागि अनुकरणीय कामहरू गर्दै आएको उल्लेख गर्नुभयो।

अरनिको सभाभवन र थन्थु दरबारजस्ता योजनालाई भक्तपुरको गौरवका योजना भन्दै उहाँले यस्ता संरचनाले भक्तपुरको ऐतिहासिक र सांस्कृतिक पहिचानलाई पुनर्जीवित गर्ने बताउनुभयाे ।

निरीक्षण कार्यक्रममा बागमती प्रदेशसभा सांसद सुरेन्द्रराज गोसाइँ, भक्तपुर नगरपालिकाका प्रमुख सुनिल प्रजापति, उपप्रमुख रजनी जोशी, वडा नं. १ का वडाध्यक्ष श्यामकृष्ण खत्री, वडा नं. ४ का वडाध्यक्ष उपेन्द्र सुवाल, प्राविधिक टोली, कर्मचारी तथा स्थानीयवासीहरूको उपस्थिति रहेको थियो।