- ३१ आश्विन २०८३, शनिबार / Oct 17, 2026
काठमाण्डौ । सरकारले नीति तथा कार्यक्रम प्रस्तुत गर्ने तयारी गरेको छ । सरकारले संसदको गतिरोध अन्त्य गरेरै जेठ १ गते नीति तथा कार्यक्रम प्रस्तुत गर्ने तयारी गरेको हो ।
संसदको गतिरोध अन्त्यका लागि प्रधानमन्त्री पुष्पकमल दाहाल प्रचण्डले आइतबार कांग्रेसका सभापति शेरबहादुर देउवासहितका नेताहरुसँग छलफल गरेका थिए । प्रधानमन्त्रीले कांग्रेससँग सहमति हुने र सरकारको नीति तथा कार्यक्रम सहज ढङ्गले प्रस्तुत गर्न वातावरण बन्ने बताएका छन् ।
उपप्रधानमन्त्री तथा गृहमन्त्री रवी लामिछानेले सहकारीमा बचतकर्ताको रकम अपचलन गरेको विषयमा अनुसन्धान गर्न संसदीय छानविन समिति बनाउनैपर्ने अडानसहित कांग्रेसले प्रतिनिधिसभाको बैठक अवरुद्ध गर्दै आएको छ ।
जेठ १ गते राष्ट्रपति रामचन्द्र पौडेलले सङ्घीय संसदको संयुक्त बैठकमा आर्थिक वर्ष २०८१–८२ को नीति तथा कार्यक्रम प्रस्तुत गर्ने कार्यतालिका रहेको छ ।
नेपाली कांग्रेसको संसदीय दलको सोमबार बस्ने बैठकमा संसदको बैठकमा कसरी प्रस्तुत हुने भन्नेबारे समेत छलफल हुने नेताहरुले बताएका छन् ।
