- २६ असार २०८३, शुक्रबार / Jul 10, 2026
काठमाडौँ । शुक्रबारदेखिको निरन्तर वर्षाका कारण अरनिको र बीपी राजमार्गमा पूर्वतर्फबाट आएका सवारीसाधनहरूलाई विभिन्न स्थानमा होल्ड गरिएको छ।
लगातारको वर्षासँगै विभिन्न ठाउँमा लेदासहितको पहिरो खसेपछि, ट्राफिक प्रहरीले यात्रुको सुरक्षालाई ध्यानमा राख्दै सवारीसाधनलाई रोकेको हो। ट्राफिक प्रहरीका अनुसार, अहिले धुलिखेल, काभ्रेभन्ज्याङ, भकुण्डे र मङ्गलटार क्षेत्रमा सवारीसाधन रोकिएको छ।
पहिरोका कारण बिहानदेखि अरनिको राजमार्गमा आवागमन अवरुद्ध बनेको छ। विशेषगरी धुलिखेल–खावाखण्डअन्तर्गत तिरतिरे धारामा खसेको पहिरोका कारण सडक पूर्ण रूपमा बन्द भएको जनाइएको छ।
प्रहरीले पहिरो पन्छाउने काम भइरहेको भए पनि निरन्तर वर्षाका कारण समस्या समाधानमा ढिलाइ हुनसक्ने जनाएको छ। यात्रुहरूलाई अनावश्यक यात्रा नगर्न र वैकल्पिक मार्ग प्रयोग गर्न पनि आग्रह गरिएको छ।
