- १५ जेष्ठ २०८३, शुक्रबार / May 29, 2026
काठमाडौँ, २५ भाद्र । देशमा शान्ति, सुरक्षा तथा अमनचैन कायम गर्न नेपाली सेनालगायत अन्य सुरक्षा निकाय निरन्तर खटिएको जनाउँदै सेनाले आम नागरिकलाई सचेत रहन र निरन्तर निगरानी गर्न आग्रह गरेको छ।
सैनिक जनसम्पर्क तथा सूचना निर्देशनालयले मंगलबार जारी गरेको सूचनामा समाजमा अवाञ्छित गतिविधि हुन नदिन प्रत्येक समुदायले एकजुट भई खबर आदान–प्रदान गर्नुपर्ने उल्लेख छ। सुरक्षाकर्मी पुग्नुअगावै स्थानीय तहमा सजगता अपनाउनुपर्ने निर्देशनालयको भनाइ छ।
हाल देशमा देखिएका सुरक्षा चुनौती, लुटपाट, आगजनी तथा जीउधनमा क्षति पुर्याउने मनसायले अराजक गतिविधि गर्ने तत्वलाई देखेमा नेपाली सेनाको ९८६३०२९०२९ नम्बरमा तत्काल सन्देश पठाउन अनुरोध गरिएको छ।
सूचनामा भनिएको छ, “केही उच्छृङ्खल तत्वले भ्रामक खबर सामाजिक सञ्जालमा राखेर स्थितिलाई अतिरञ्जित बनाउन खोजेका छन्। त्यसैले त्रास सिर्जना गर्ने यस्ता गतिविधि रोक्न आ–आफ्नो क्षेत्रमा सही खबर मात्र सम्प्रेषण गरी सहयोग पुर्याउन आग्रह गर्दछौं।”
