- २५ भाद्र २०८३, बिहीबार / Sep 10, 2026
काठमाडौं । आर्टिफिसियल इन्टलिजेन्स (एआई)को प्रयोग गरी भिडियो बनाउँदै नेताहरुको चरित्र हत्या गरेको आरोपमा एक युवक पक्राउ परेका छन् ।
नेपाल प्रहरीको साइबर ब्यूरोका प्रमुख डीआईजी नविन्द अर्यालका अनुसार पक्राउ पर्नेमा बाजुराको खप्तड छडदह गाउँपालिका–५ स्थायी घर भएका २२ वर्षीया रमेशबहादुर रावल छन् । अनुसन्धानबाट संलग्नता खुलेपछि उनलाई सिन्धुपाल्चोकबाट पक्राउ गरेर काठमाडौं ल्याइएको अर्यालले बताए । रावलको साथबाट भिडियो बनाउन प्रयोग भएको मोबाइल र ल्यापटप पनि बरामद भएको छ ।
फेसबुकमा एआई भिडियो हालेर आफ्नो चरित्र हत्या गरिएको भन्दै काठमाडौं महानगरपालिकाकी उपमयेर सुनिता डंगोलले चार दिनअघि साइबर ब्यूरोमा अनुसन्धान गर्न भन्दै निवेदन दिएकी थिइन् ।
रावललाई पक्राउ गरेर मोबाइल जाँच गर्दा रावलले अन्य नेताहरुको पनि उस्तै प्रकृतिको भिडियो बनाएर सामाजिक सञ्जालमा हाल्ने गरेको भेटिएको अधिकृतहरु बताउँछन् ।
