दक्षिण सुडानकाे झडपमा परि कम्तीमा १६ जनाको मृत्यु

एजेन्सी । दक्षिण सुडान पिपुल्स डिफेन्स फोर्स (एसएसपीडीएफ) र सुडान पिपुल्स लिबरेसन आर्मी-इन–अपोजिसन (एसपीएलए-आईओ) बीच झडप भएकाे छ ।  झडपमा एक सैनिकसहित कम्तीमा १६ जनाको मृत्यु भएको छ ।

नागेरो काउन्टीका कमिश्नर हेनरी बांगडा असायाले यस हिंसाले ७९ हजारभन्दा बढी मानिसलाई विस्थापित गरेको र विस्थापितमध्ये धेरै झाडीमा लुकेकाे बताएका छन् । उनले भनेका छन्,  ‘बुधबार साँझ पनि लडाइँ जारी थियो । लडाइँ भएको ठाउँमा सेनाका भारी हतियारहरू गएको मैले देखेको छु । लडाई पश्चिमी बहर अल गजल राज्यको बाजियामा फैलिएको हाे ।’

यता एसएसपीडीएफका प्रवक्ता लुल रुई कोआङले कुब्री–बु ब्रिजमा रहेको अवैध चेकपोस्ट भत्काउन एसपिएलए–आईओ सेनाले अस्वीकार गरेपछि झडप शुरु भएको बताए । त्यसैगरी कउङका अनुसार, एसपीएलए–आईओ बलहरू मंगलबार साँझ एसएसपीडीएफ–नियन्त्रित क्षेत्रमा प्रवेश गरे र आक्रमण गरे, जसको परिणामस्वरूप एक सैनिकको मृत्यु भयो र तीनजना घाइते भएका हुन्।