- १५ जेष्ठ २०८३, शुक्रबार / May 29, 2026
काठमाडौँ, १६ साउन । बागमती प्रदेशका मुख्यमन्त्री बहादुर सिंह लामाले राजीनामा दिने तयारी गरेका छन्। नेपाली कांग्रेसको प्रदेश संसदीय दलको नेतामा पराजित भएपनि लामो समयसम्म पदमा यथावत रहेका लामा अन्ततः सभापति शेरबहादुर देउवाको निर्देशनपछि पछि हट्न तयार भएका हुन्।
सभापति देउवाले बिहीबार लामा सामु व्यक्तिगत रूपमा स्पष्ट सन्देश दिँदै अब मार्ग प्रशस्त गर्न निर्देशन दिएका थिए। देउवासँगको भेट शुक्रबार बिहान १० बजेका लागि तय भएको थियो। देउवा निकट सांसद तीर्थ लामाका अनुसार, थप अन्तिम छलफलपछि शनिबार वा आइतबार बिहानभित्र राजीनामा दिने तयारी भइरहेको छ।
यसअघि कांग्रेसको आन्तरिक विवाद समाधानका लागि देउवा र प्रधानमन्त्री केपी शर्मा ओलीबीच बालुवाटारमा छुट्टै छलफल भएको थियो। स्रोतका अनुसार लामा अहिले सरकारमा आफ्नो समूहको सम्मानजनक सहभागिता सुनिश्चित गर्न पार्टी नेतृत्वसँग समन्वयमा छन्।
यदि लामा राजीनामा दिन तयार भए, कांग्रेसका इन्द्र बानियाँलाई नयाँ मुख्यमन्त्री बनाउने योजना अघि बढ्नेछ। बागमती प्रदेशको नेतृत्वमा फेरबदलको संकेतसँगै प्रदेशको राजनीतिक भविष्य नयाँ मोडमा प्रवेश गर्ने देखिएको छ।
