- २७ भाद्र २०८३, शनिबार / Sep 12, 2026
काठमाडौं । उपत्यकाको फोहरमैला व्यवस्थापन सेनेटरी ल्यान्डफिल साइटको निगरानी अब सीसीटीभीबाट हुने भएको छ । फोहोर व्यवस्थापन हुने गरेको ल्यान्डफिल साइट नुवाकोट र धादिङ जिल्लाको सीमाना बञ्चरेडाँडामा रहेको छ । त्यसको निगरानी काठमाडौं प्लाजाबाट सुरु भएको छ ।
संस्थागत सुधारको कार्यक्रममध्ये कार्य सञ्चालन हुने ठाउँका विषयमा जानकारी तथा सूचना लिन सीसीटीभी क्यामरा जडान गरिएको हो । साइटमा प्रवेश गर्ने सवारी साधन तथा व्यक्ति प्रवेशसहितका क्रियाकलापमा निगरानी गरेर सम्भावित अनधिकृत क्रियाकलाप रोक्न प्रणाली जडान गरिएको छ ।
क्यामराबाट प्राप्त दृश्य महानगरका प्रमुख प्रशासकीय अधिकृत प्रदीप परियारको कार्य कक्ष रवातावरण व्यवस्थापन विभागबाट निगरानी हुने महानगरले जनाएको छ । साइट व्यवस्थापनको काममा खटिएका जनशक्ति, कार्यालय, साइटमा पुग्ने सडक, सुरक्षा वुथ देखिने गरी क्यामरा राखिएका छन् ।
९ वटा क्यामराका दृश्यबाट साइटको निगरानी हुने वातावरण व्यवस्थापन विभागका प्रमुख सरिता राईले बताइन् । पछिल्लो समय जडान गरिएका क्यामरा अटोमेटिक नम्बर प्लेट रिकोग्निजेसन (एएनपीआर) क्यामरा हुन् ।
यसबाट भिडियोको आवाज पनि सुन्न सकिने र डिजिटल मात्र नभइ, हातैले लेखेका नम्बर प्लेट पनि पढ्न सकिने तथा रेकर्ड राख्न सकिने भएको सूचना प्रविधि विभागका प्रमुख अनिरुद्र नेपालले बताए ।
