- २० असार २०८३, शनिबार / Jul 4, 2026
काठमाडौँ, १७ भाद्र । हाल मनसुनको न्यून चापीय रेखा सरदर स्थानभन्दा दक्षिणतिर अवस्थित भएकाले देशका विभिन्न भागमा वर्षा भइरहेको छ। मौसम पूर्वानुमान महाशाखाका अनुसार कोशी र सुदूरपश्चिम प्रदेशमा सामान्य बदली तथा अन्य प्रदेशमा आंशिक बदली छ।
कोशी, गण्डकी, लुम्बिनी र कर्णाली प्रदेशका केही स्थानमा मेघगर्जन र चट्याङसहित हल्का वर्षा भइरहेको छ।मंगलबार बिहानको मापनअनुसार नारायणी, बागमती, कर्णाली र तिनका सहायक नदीहरू सतर्कता तहभन्दा तल रहेका छन्। तर कोशी, महाकाली र तिनका सहायक नदीहरूको बहाव सतर्कता आसपास पुगेको छ।
आज कञ्चनपुर र आसपासका जिल्लामा स–साना नदीहरूको बहाव उल्लेख्य बढ्ने र केहीमा आकस्मिक बाढीको उच्च जोखिम रहने देखिएको छ। यस्तै दोलखा, सिन्धुपाल्चोक, रामेछाप, हुम्ला, बझाङ, बाजुरा, डोटी, अछाम, दार्चुला, बैतडी, डडेल्धुरा र कैलालीका स–साना नदीहरूमा मध्यमदेखि उच्च स्तरको आकस्मिक बाढीको सम्भावना रहेको छ।
त्यस्तै इलाम, झापा, मोरङ, ताप्लेजुङ, सङ्खुवासभा, सोलुखुम्बु, ओखलढुङ्गा, खोटाङ, रसुवा, धादिङ, नुवाकोट, काठमाडौं उपत्यका, गोरखा, लमजुङ, तनहुँ, डोल्पा, मुगु, बर्दिया लगायतका जिल्लामा पनि केही स–साना नदीहरूको बहाव उल्लेख्य बढ्ने र आकस्मिक बाढीको मध्यम जोखिम रहन सक्ने पूर्वानुमान गरिएको छ।
