पाँचथरको हेवा खोलामा बेलिब्रिज खस्दा तीन मजदुरको मृत्यु

फिदिम, १ असार । मेची राजमार्गअन्तर्गत पाँचथरको हेवा खोलामा निर्माणाधीन बेलिब्रिज खस्दा घाइते भएका तीन मजदुरको उपचारका क्रममा मृत्यु भएको छ। मृत्यु हुनेमा बारा सिमरा उपमहानगरपालिका–१२ का २२ वर्षीय रूपलाल चौधरी, २७ वर्षीय राजन चौधरी र २२ वर्षीय राकेश चौधरी रहेका छन्।

गम्भीर घाइते भएका उनीहरूलाई पाँचथर अस्पतालबाट विराटनगरस्थित नोवेल मेडिकल कलेज टिचिङ अस्पताल पुर्‍याइएको थियो। अस्पताल पुग्नेबित्तिकै चिकित्सकले तिनै जनालाई मृत घोषणा गरेको जिल्ला प्रहरी कार्यालय पाँचथरले जनाएको छ।

बाँकी तीन जना घाइते मजदुरको विराटनगरमा नै उपचार भइरहेको छ। २०८१ साल असोज १२ गते आएको बाढीले यहाँको पुरानो बेलिब्रिज बगाएपछि पुनः जडानको काम भइरहेको थियो।

जडान कार्यका क्रममा बेलिब्रिज अचानक भत्किँदा ६ जना मजदुर घाइते भएका थिए। दुर्घटना भएको हेवा खोला फिदिम नगरपालिका–४ र हिलिहाङ गाउँपालिका–७ को सीमानामा पर्छ ।