- २४ भाद्र २०८३, बुधबार / Sep 9, 2026
भक्तपुर । भक्तपुर नगरपालिकाका प्रमुख सुनिल प्रजापतिसँगले भक्तपुर नगरपालिकाले शिक्षा, स्वास्थ्य र सामाजिक विकास संगै खेलकुदलाई पनि विशेष महत्व दिएको बताएका छन् । नेपाल बक्सिङ महासंघका अध्यक्ष राम अवालेसहितका पदाधिकारीहरुसंग मंगलबार भनपा सभाकक्षमा भएको भेटमा प्रमुख प्रजातिले उक्त कुरा बताएका हुन ।
भेटमा भक्तपुरमा बक्सिङ खेल विकासबारे छलफल भएको जनाइएको छ । बक्सिङ खेलको विकासबारे बक्सिङ महासंघसँग समन्वय गर्दै अगाडि जाने विषयमा नगरपालिका सकारात्मक रहेको बताउँदै भक्तपुर नपाको निर्वाचन घोषणापत्र अनुसार प्रत्येक वर्ष अन्तरनगर खेलकुद प्रतियोगिता र अन्तरविद्यालय खेलकुद प्रतियोगिताको आयोजना गर्दै आइरहेको जानकारी गराए ।
उनले खेलकुद विकाससम्बधी गतिविधिहरु नगरपालिकाले संचालन गर्दै आएको बताउँदै फुटबल, भलिबल, बक्सिङ, कराते र टेबुलटेनिसलगायतको नियमित प्रशिक्षण सञ्चालन गर्दै आएको बताए । बक्सिङ खेलकाबारे महासंघले राखेको प्रस्ताव बैठकमा राखेर छलफल गर्ने विश्वास दिलाए ।
भेटमा नेपाल बक्सिङ महासंघका अध्यक्ष राम अवालले बक्सिङ खेललाई पनि प्राथमिकतामा राख्न सके बक्सिङ खेलको विकासमा टेवा पुग्ने विश्वास व्यक्त गरे । उनले भक्तपुर नपाले यस वर्ष अन्तरनगर खेलकुद प्रतियोगितामा बक्सिङ खेल समावेशको लागि अनुरोध समेत गरे ।
उनले भक्तपुरले खेलकुद क्षेत्रको विकासमा गरिरहेको कार्यहरु सराहनीय भएको बताउँदै बक्सिङ प्रतियोगिता आयोजनाले नयाँ बक्सिङ खेलाडीहरु उत्पादनमा समेत महत्वपूर्ण भूमिका रहने बताए ।
