- १६ भाद्र २०८३, मंगलवार / Sep 1, 2026
काठमाडौँ, १६ भदाै । रसुवाको भोटेकोशी नदीमा आएको बाढीको सातौँ दिन आज पनि खोज, उद्धार तथा राहत वितरणको काम जारी छ । बाढीका कारण रसुवा र नुवाकोटका विभिन्न जलविद्युत् आयोजनाका सुरुङमा फसेकाहरूको उद्धार प्रयास भइरहेको छ ।
पाँच सयभन्दा बढी व्यक्ति सुरुङभित्र फसेको आशङ्कामा उद्धार टोलीले खोजी तथा उद्धारको प्रयास गरिरहेको भए पनि अहिलेसम्म सफलता मिल्न सकेको छैन । राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार बाढीमा फसेका तथा अलपत्र परेका ११ हजार ३७९ जनाको उद्धार भइसकेको छ । अझै ३ हजार ९२५ जना सम्पर्कविहीन रहेको प्राधिकरणले जनाएको छ ।
सम्पर्कविहीन हुनेमा सबैभन्दा धेरै जलविद्युत् आयोजनामा कार्यरत व्यक्ति छन् । प्राधिकरणका अनुसार जलविद्युत् आयोजनाबाट मात्रै ६३९ जना सम्पर्कविहीन भएका छन् । बाढी तथा पहिरोमा परी अहिलेसम्म ९३९ जनाको शव फेला परेको छ । फेला परेका शवमध्ये रसुवामा २३, नुवाकोटमा ९५, धादिङमा ५५, गोरखामा ६५, नवलपरासी पूर्वमा २१६, नवलपरासी पश्चिममा १६८, तनहुँमा ३८ र चितवनमा २७९ जना रहेका छन् ।
खोज तथा उद्धारका लागि २१ हजारभन्दा बढी सुरक्षाकर्मी परिचालन गरिएको छ । सरकारले खोज, उद्धार तथा राहत वितरणको काम निरन्तर भइरहेको जनाएको छ ।
तर, उद्धार तथा राहत प्रभावकारी हुन नसकेको भन्दै बाढी प्रभावितहरूले गुनासो गरेका छन् । सम्पर्कविहीनको खोजी तथा सुरुङमा फसेकाहरूको उद्धारलाई तीव्र बनाउन प्रभावितले माग गरेका छन् ।
