- २ कार्तिक २०८३, सोमबार / Oct 19, 2026
काठमाडौँ, २८ असाेज । हमासको नियन्त्रणमा रहँदा मृत्यु भएका दाबी गरिएका नेपाली विद्यार्थी विपिन जोशीको शव अन्ततः इजरायललाई बुझाइएको छ। सोमबार राति हमासले अन्तर्राष्ट्रिय रेडक्रसमार्फत विपिनसहित चार जनाको शव इजरायललाई हस्तान्तरण गरेको हो।
टाइम्स अफ इजरायलका अनुसार इजरायली सेनाले रेडक्रसमार्फत विपिनसहित गाइ इलाउज, योशी शाराबी र ड्यानियल पेरेजको शव प्राप्त भएको पुष्टि गरेको छ। इजरायलका लागि नेपाली राजदूत धनप्रसाद पण्डितले पनि विपिनको शव तेलअभिभस्थित इजरायली सेनाको अस्पतालमा ल्याइपुर्याइएको जानकारी दिएका छन्।
चारै शवलाई तेलअभिभस्थित अबु काबिर फरेन्सिक इन्स्टिच्युटमा लगिएको छ, जहाँ पहिचान र पोस्टमार्टम प्रक्रिया सुरु गरिएको छ।
फरेन्सिक परीक्षण सकिएपछि शवहरू परिवारको जिम्मा लगाइनेछ र त्यसपछि विपिनको शव नेपाल ल्याउने तयारी भइरहेको बताइएको छ।
