वीरगञ्जको अवैध गोदाममा छापा मार्दा झडप

वीरगञ्ज, २७ माघ । वीरगञ्जको आदर्शनगरस्थित अवैध गोदाममा छापा मार्ने क्रममा सशस्त्र प्रहरीमाथि आक्रमण गर्ने चार जनालाई प्रहरीले पक्राउ गरेको छ ।

वीरगञ्ज भन्सार कार्यालय र सशस्त्र प्रहरी बलको संयुक्त टोलीले सोमबार आदर्शनगरमा रहेको मदनप्रसाद गुप्ताको घरमा भन्सार छली गरी भित्र्याइएको सामान गोदाम गरी राखिएको आशङ्कामा छापा मारेको थियो ।

सो क्रममा स्थानीय व्यापारी समूहले आक्रमण गर्दा तीन जना सशस्त्र प्रहरी घाइते भएका थिए भने सशस्त्र प्रहरीका दुई वटा सवारीसाधनमा क्षति पुगेको थियो । पर्सा प्रहरीका प्रवक्ता तथा प्रहरी नायब उपरीक्षक हरिबहादुर बस्नेतका अनुसार घटनामा संलग्न चार जनालाई सोमबार रातिसम्म पक्राउ गरिएको हो ।

उनले सशस्त्र प्रहरीमाथि आक्रमण गर्नेहरूको पहिचान सिसीक्यामेरा फुटेजका आधारमा गरिएको र घटनाबारे थप अनुसन्धान भइरहेको जानकारी दिए ।

अनुसन्धान जारी रहेकाले पक्राउ परेकाहरूको नाम हाल सार्वजनिक नगरिएको प्रहरीको भनाइ छ । छापा मार्ने क्रममा सो गोदामबाट करिब १२ लाख ५० हजार रुपैयाँ मूल्य बराबरका कपडा बरामद गरिएको सशस्त्र प्रहरीले जनाएको छ ।