- २७ श्रावण २०८३, बुधबार / Aug 12, 2026
काठमाण्डौ, २१ असार । मनसुन सक्रिय भएसँगै सम्भावित बाढीपहिरोको जोखिमलाई ध्यानमा राख्दै बीपी राजमार्गमा रातिको समयमा गाडी चलाउन एक महिनाका लागि रोक लगाइएको छ।
काभ्रेको काभ्रेभञ्ज्याङदेखि सिन्धुलीको सिमाना नेपालथोकसम्म बेलुका ६:३० बजेदेखि बिहान ५ बजेसम्म सवारी सञ्चालनमा प्रतिबन्ध लगाइएको हो। जिल्ला प्रशासन कार्यालय काभ्रेले जारी गरेको सूचनाअनुसार यो रोक भोलिदेखि लागू हुनेछ।
यसअघि असार ७ गतेदेखि १५ दिनको लागि लागू गरिएको रात्रीकालीन रोकलाई थप विस्तार गरिएको हो। काभ्रेका प्रमुख जिल्ला अधिकारी उमेश ढकालले बाढी र पहिरोको सम्भावना रहेकाले यात्रुहरूको सुरक्षाका लागि यस्तो निर्णय गरिएको बताए।
उनका अनुसार, रातिको समयमा काठमाडौँतर्फ आउने र काभ्रेतर्फ जाने गाडी क्रमशः नेपालथोक र काभ्रेभञ्ज्याङमा रोकिनेछ। गएको वर्षको असोजमा आएको बाढीपहिरोले बीपी राजमार्गमा ठूलो क्षति पुर्याएको थियो। अहिले राजमार्गको पुनर्निर्माण कार्य चार खण्डमा बाँडेर ठेक्का प्रक्रिया अघि बढाइएको छ।
पूर्वी नेपाललाई काठमाडौँसँग जोड्ने यो छोटो दूरीको वैकल्पिक राजमार्ग अत्यधिक प्रयोग हुने मार्ग हो, जहाँ दैनिक हजारौँ गाडी गुड्ने गर्छन्। यस्तो निर्णयले यात्रुहरूलाई केही असहज भए पनि सुरक्षाका दृष्टिले आवश्यक कदम भएको प्रशासनले जनाएको छ।
