- २४ आश्विन २०८३, शनिबार / Oct 10, 2026
चितवन, २० असार । चितवनको बुढी राप्ती नदीमा माछा मार्ने क्रममा गोहीको आक्रमणबाट एक युवकको मृत्यु भएको छ।
जिल्ला प्रहरी कार्यालय चितवनका अनुसार रत्ननगर नगरपालिका–८ चित्रसारीका २७ वर्षीय अविषेक माझीको गोहीको आक्रमणबाट ज्यान गएको हो। प्रहरीका अनुसार बिहीबार राति करिब ९ बजे अविषेक माझी स्थानीय राजकुमार माझीसँग माछा मार्दै थिए।
सोही क्रममा उनलाई गोहीले नदीमा तानेर बेपत्ता बनाएको थियो। प्रहरी नायब उपरीक्षक (डीएसपी) रविन्द्र खनालका अनुसार अविषेकको शव घटनास्थलबाट करिब २०० मिटर तल राति १:२० बजे फेला परेको हो।
बुढी राप्ती नदीमा घडियाल प्रजातीका गोहीहरूको बाक्लो बसोबास रहेको छ। प्रहरीका अनुसार नदी दक्षिणतर्फ बग्ने भए पनि गोहीले युवकलाई उल्टो धारतर्फ तानेर लगेको थियो। यस घटनाले जोखिमयुक्त क्षेत्रको सुरक्षाको सवाल पुनः उठाएको छ।
