गुगल नक्सा सर्भे गर्न आएको कारमा आगजनी

काठमाडौं । भरतपुर महानगरपालिका वडा न ७, कृष्णपुरस्थित गुगल नक्सा सर्भे गर्न आएको टोली चढेको कारमा आगजनी भएको छ । रेलमार्ग सर्भे गर्न आएको आरोप लगाउँदै स्थानीयले आगजनी गरेका हुन् ।

बुधबार बागमती प्रदेश ०१–०३०च ७१९० नम्बरको रोकी राखेको कारमा स्थानीयले आगजनी गरेको प्रमुख जिल्ला अधिकारी इन्द्रदेव यादवले बताए । आरएस इन्जिनियरिङ सोलुशन प्रालि कालोपुल काठमाडौँबाट दुई जना उक्त कारमा आएका थिए ।

बाराको जितपुर सिमरा उपमहानरपालिका बस्ने वर्ष २१ का अजित बस्नेत र धादिङ गल्छी गाउँपालिका– ८ बस्ने वर्ष ३५ का कार चालक दिलीप तामाङले कार रोकी सडक सर्भे गर्न गएको बेला कारमा आगजनी भएको हो।

कार पूर्णरुपमा क्षति भएको छ भने दुवै जनालाई प्रहरीले सुरक्षित राखेको छ । गुगल नक्सा सर्भेका लागि आएको आफूलाई बताएको प्रजिअ यादवले बताए ।