सातगाउँले जात्रा मनाइँदै

काठमाण्डौ । सातगाउँले जात्रा काठमाण्डौको दक्षिण–पश्चिम क्षेत्रमा मनाइँदैछ । सात गाउँले जात्रा अन्तर्गत विष्णुदेवी, बालकुमारी, भैरव, गणेश, इन्द्रायणीलगायतको खटजात्रा कीर्तिपुर र चन्द्रागिरि नगरपालिका विभिन्न ठाउँमा मनाउँने चलन रहेको छ ।

परम्पराअनुसार सातगाउँका शक्तिपीठमध्ये विष्णुदेवीलाई आमा र मच्छेगाउँ, बोसीगाउँ, सतुङ्गलका शक्तिपीठ र भैरवलाई उनका सन्तान मानिन्छ । आमालाई भेट्न हरेक वर्ष यहीबेला सन्तानहरु आउने विश्वासअनुसार सबै गाउँको रथ विष्णुदेवी पीठमा ल्याउने गरिन्छ ।

विष्णुदेवी पीठ केन्द्रित गरेर मनाइने सातगाउँले जात्रा कीर्तिपुर, मच्छेगाउँ, बोसीगाउँ, ल्होखा, सतुङ्गल, पाँगा र नगाउँमा अस्तिदेखि नै शुरु भएको हो । कीर्तिपुरमा इन्द्रायणी जात्रा तथा पाँगाको दुई ठाउँमा विष्णुदेवी र बालकुमारी रथयात्रा हुने गर्छ ।

जात्राको अवसरमा आज कीर्तिपुर नगरपालिकाका सबै र चन्द्रागिरि नगरपालिकाका ८, ९, १०, ११, १३, १४ र १५ नम्बर वडामा स्थानीय बिदा दिइएको छ । सातगाउँले जात्रा मुख्य गरी अष्टमी, नवमी र दशमी गरी तीन दिन मनाइन्छ । सातगाउँले जात्रालाई नेपाल भाषामा बखुमदः न्हय्गाँ जात्रा भनिन्छ ।