- २६ असार २०८३, शुक्रबार / Jul 10, 2026
काठमाडौँ, २४ माघ । केन्द्रीय सुरक्षा समितिले जिल्लास्तरमा निर्वाचन आचारसंहिता अनुगमनलाई अझ प्रभावकारी बनाउने निर्णय गरेको छ। गृहमन्त्री ओमप्रकाश अर्यालको अध्यक्षतामा बसेको समितिको बैठकले निर्वाचन प्रक्रियालाई स्वच्छ, निष्पक्ष, पारदर्शी र विश्वसनीय बनाउने विषयमा विभिन्न निर्णय गरेको हो।
बैठकले सञ्चार सम्पर्क नहुने मतदानस्थलको पहिचान गरी वैकल्पिक सञ्चार व्यवस्था मिलाउने, निर्वाचन आचारसंहिताको उल्लङ्घन हुने गरी मिथ्या तथा भ्रमपूर्ण सूचना र घृणास्पद अभिव्यक्ति दिने व्यक्तिहरूको निगरानी गर्ने निर्णय गरेको गृह मन्त्रालयले जनाएको छ।
गृह मन्त्रालयका प्रवक्ता आनन्द काफ्लेका अनुसार आउँदो फागुन २१ गते हुने प्रतिनिधिसभा सदस्य निर्वाचनलाई लक्षित गरी सर्वसाधारणलाई निर्वाचनसम्बन्धी सही र भरपर्दो सूचनामा सहज पहुँच पुर्याउने व्यवस्था गरिनेछ। साथै, सामाजिक सञ्जालको दुरुपयोग रोक्न नेपाल प्रहरीको विशेष संयन्त्रलाई थप सशक्त र जिम्मेवार बनाइने निर्णय भएको छ।
बैठकमा चुनावका क्रममा सुरक्षाकर्मीको परिचालन, उम्मेदवारको सुरक्षा व्यवस्थापन, चुनाव विरोधी गतिविधि नियन्त्रण गरी कानुनी दायरामा ल्याउने विषयमा पनि छलफल भएको प्रवक्ता काफ्लेले जानकारी दिनुभयो।
त्यसैगरी, पेट्रोलियम पदार्थको खुला खरिद बिक्री तथा दुरुपयोग रोक्न आवश्यक कदम चाल्ने निर्णयसमेत गरिएको गृह मन्त्रालयले जनाएको छ।
