- ८ बैशाख २०८३, मंगलवार / Apr 21, 2026
एजेन्सी, २४ माघ । युरोपेली आयोगले चिनियाँ स्वामित्वको सामाजिक सञ्जाल टिकटकलाई आफ्नो प्लेटफर्ममा प्रयोग हुँदै आएका ‘लत’ लाग्ने खालका सामग्री र डिजाइन परिवर्तन गर्न निर्देशन दिएको छ।
निर्देशन पालना नगरेमा ईयूको डिजिटल सामग्रीसम्बन्धी नियमअन्तर्गत कडा जरिवाना हुन सक्ने चेतावनी पनि दिइएको छ। युरोपेली आयोगका अनुसार टिकटकले विशेष गरी नाबालिग र कमजोर वयस्क प्रयोगकर्तामा पर्ने नकारात्मक प्रभाव न्यूनीकरण गर्न प्रभावकारी कदम नचालेको आरोप लगाइएको छ।
आयोगका प्रवक्ता थोमस रेग्नियरले अत्यधिक सामग्री प्रयोगलाई प्रोत्साहन गर्ने स्वचालित भिडियो प्रसारण, प्रचारात्मक सूचना र अत्यधिक व्यक्तिगत सिफारिस प्रणालीले प्रयोगकर्तालाई लततर्फ धकेल्ने जोखिम बढाएको बताए। यस्ता ‘लत’ लाग्ने डिजाइनहरू ईयूको डिजिटल सेवा ऐन (डीएसए) को उल्लङ्घन भएको उनको भनाइ छ।
यसले विशेष गरी जोखिम वर्गका प्रयोगकर्ताको मानसिक स्वास्थ्य र समग्र कल्याणमा गम्भीर असर पार्ने आयोगको ठहर छ। यद्यपि, टिकटकका प्रवक्ताले विज्ञप्ति जारी गर्दै युरोपेली आयोगको निष्कर्ष अस्वीकार गरेको समाचार संस्था एएफपीले जनाएको छ।
