हिमाली भू–भागका एक–दुई स्थानमा हल्का हिमपातको सम्भावना

काठमाडौं । आइतबार देशको पहाडी भू–भागमा आंशिक बदली रहने सम्भावना रहेको छ । नेपालमा पश्चिमी वायुको आंशिक प्रभाव परेकाले केही भागमा आंशिक बदली रही बाँकी भू–भागमा मुख्यतया सफा रहने मौसम विज्ञान विभागले जनाएको छ।

कोशी, बागमती, गण्डकी र कर्णाली प्रदेशको पहाडी भू–भागमा आंशिकदेखि साधारणतया बदली रही बाँकी भू–भागमा आंशिक बदलीदेखि मौसम मुख्यतया सफा रहनेछ। देशका तराईका अधिकांश स्थानहरूमा हुस्सु र कुहिरो लागेको विभागले जनाएको छ ।

विभागका अनुसार दिउँसो देशभर आंशिकदेखि साधारणतया बदली रहनेछ। कोशी, बागमती र गण्डकी प्रदेशको उच्च पहाडी तथा हिमाली भू–भागका एक–दुई स्थानमा हल्का हिमपातको सम्भावना रहेको छ।