ठमेलस्थित होटलबाट दुई जना चिनियाँ नागरिक पक्राउ

काठमाडौँ, ६ साउन । काठमाडौँको पर्यटकीय क्षेत्र ठमेलस्थित एक होटलबाट प्रहरीले दुई जना चिनियाँ नागरिकलाई २ केजी सुन र २४ लाख नगदसहित पक्राउ गरेको छ।

उपत्यका अपराध अनुसन्धान कार्यालयको टोलीले सोमबार राति विशेष सूचनाका आधारमा उनीहरूलाई नियन्त्रणमा लिएको हो। पक्राउ पर्नेमा चीनको सियाचिन घर भएकी ३४ वर्षीय सुमेई चोउ र ४६ वर्षीय चुनलिन थान छन्।

उनीहरूको साथबाट प्रहरीले २ किलो सुन र २४ लाख नेपाली रुपैयाँ नगद बरामद गरेको उपत्यका अपराध अनुसन्धान कार्यालयका प्रमुख एसएसपी रमेश बस्नेतले जानकारी दिए। प्रहरी अनुसन्धान अनुसार, चुनलिन थान डेढ महिनाअघि नेपाल आएका थिए र ठमेलस्थित एक होटलमा बस्दै आएका थिए।

सुमेई चोउ भने केही दिनअघि मात्र काठमाडौँ आएकी थिइन्। प्रारम्भिक अनुसन्धानबाट उनीहरूबीच प्रेम सम्बन्ध रहेको खुल्न आएको छ।

उनीहरूलाई प्रारम्भिक अनुसन्धानपछि थप कारबाही र कानुनी प्रक्रिया अघि बढाउन राजस्व अनुसन्धान विभागमा बुझाउने तयारी गरिएको प्रहरीले जनाएको छ। प्रहरीले यो घटनालाई सुन तस्करी वा अवैध कारोबारसँग सम्बन्धित हुनसक्ने आशंका गर्दै विस्तृत अनुसन्धान अघि बढाएको छ।