- २५ फाल्गुन २०८२, सोमबार / Mar 9, 2026
बेइजिङ, चीन । चिनियाँ वैज्ञानिकहरूले विश्वकै पहिलो यस्तो ‘बोन ग्लु’ (Bone Glue) तयार गरेका छन्, जसले भाँच्चिएको हड्डीलाई केवल २–३ मिनेटमै जोड्न सक्षम भएको दाबी गरिएको छ ।
यो बोन ग्लु सामुद्रिक सिपी (mussel) बाट प्रेरित भएर बनाइएको हो । वैज्ञानिकहरूका अनुसार यो बायोडिग्रेडेबल पदार्थ हो, जसले शरीरभित्र छ महिनाभित्रै आफैंँ घुल्ने क्षमता राख्छ ।
चीनको वेन्झोउ मेडिकल युनिभर्सिटीका डा. लिन जियानफेङ्ग नेतृत्वको टोलीले डेढ सयभन्दा बढी बिरामीमा यसको सफल परीक्षण गरिसकेको छ । अनुसन्धान टोलीले यसलाई सुरक्षित र अत्यन्त प्रभावकारी रहेको पुष्टि गरेको छ । डा. लिनका अनुसार यो ग्लु तयार गर्ने विचार समुद्रमा सिपीहरू लहर र ज्वारभाटामा समेत अडिग रहने क्षमताबाट आएको हो । “यदि सिपी रगतले भरिएको पानीमा पनि अडिन्छ भने, हड्डीको रगतमय सतहमा पनि टाँस्न सकिन्छ भन्ने विचारले नै यो प्रविधि जन्मियो,” उनले भने ।
बोन–०२ (Bone–02) नाम दिइएको यो जैविक पदार्थले दुई सय किलोसम्म तौल भएको वस्तुलाई पनि जोड्न सक्ने क्षमता राख्छ । सर्जरीमा प्रयोग गरेपछि भाँच्चिएका हड्डी २ देखि ३ मिनेटमै मजबुत रूपमा जोडिन्छन्, जसले उपचार समयलाई नाटकीय रूपमा घटाउने वैज्ञानिकहरूको भनाइ छ ।
स्वास्थ्य विशेषज्ञहरूका अनुसार यो प्रविधिले भविष्यमा अर्थोपेडिक सर्जरी, फ्र्याक्चर उपचार, र खेलकुद चोट उपचारमा नयाँ क्रान्ति ल्याउन सक्छ ।
